الا يامصعب الفرقـا ،،

هلا بك يابعد عمري يا قلبي أنــت يا الغـالي
تـهـلـي بـي عـيـون الحــب مــن اخـــر ليالــيـها

تقول أرجوك لا تهتم أنا في أحـسـن أحوالي
تـبـسـم لـي وهـي تمسح دمـوع العـين بيديــها

تقول الدنيا وش تسوى إذا ما شفتك إقــبالي
أبـيـع الـكـون لعيـونـك لـجـل لـحـظـه مـعـي فـيـها

تموت من الألم لــكن تبي ما يـنشغـل بــالي
ألا يـا نــاس يـا عــالــم وربــي مــن يـسـاويــهـا

وهلت دمـعـة عـيونـي بعد ما ضاق بي حالي
سجدت ادعــي بــدون شــعـور ألا يارب تشفيـها

وقـالـت لـو يشيلـونـي وعـنـك شـدو إرحـالـي
أمــانــــه يـابــعــد روحـي أبــي روحــك أوصـيــها

أبـيـك أجـمـل مــن الأول أبـي كـل ما تهـيـالي
بـعـد مــوتــي اشـوفـك مهتنـي روحــي تهنيــها

ألا يا طـيبـة الـدنــيــا ألا يا شمسي وظــلالي
نـهايــة روحــي مـن قبلك عـسى ربــي يبديــها

وشالوهـا بـسريـر ابيــض وزاد الـهـم غـربـالي
وضـاقـت فـيـنـي الـدنـيـا وأنـا نـفــسي أمـنيــها

وراحـت تنـتـظـر رجـعـه ودمـع العـين همالي
ألا لـو الـعـمــر يـعـطـى قـسـم باللـه لأعطيــها

وطاحت وردة من كفي وأنا ماشي على فالي
لقيـت الشال فـي يـدي يـضـمـه قلـب مـغليــها

جلست أراقب الساعة وأنا ادعي ربي الوالي
عسى يـاربـــي يــارحــمــن يـاقــادر تنجيـــــها

أنا من لـي بهالدنيـا وأعــيـش اشلـون بـحالي
بـعدهـا مـا أبـي نـفسي وحتى الناس مابيــهـا

قسم بالله لو مـوتــي يجيني قبلها اشوا لي
ولا أبـي تبعـد و تـــرحـل وأنـا مـا اقــدر أوفيــهـا

وجو لي اربـع اطبـاء وقـلبـي مشتعل صـالي
امـانـه هاه قــولوا لي أمـانـه وش حصـل فيــهـا

وقالـوا البقـاء بـراسـك وصـاب الارض زلـزالي
تـزلـزل كـل ما فـيـني بكــت نفسي وأمانيـهــا

ولاكني بهالدنـيـا صــرخـت بصوتــي العالي
ألا يا مصعـب الـفـرقــا وروحـي مـن يـواسيــها

عسى الرحمن يرحـمـهـا ويـغـفـر أول وتـالـي
وعسى يـا ربـي بالجنـة بـعـد مــوتـي ألاقيـهـا

هذا حب هذا عشق هذا جنون هذي الابيات كل شئ فيها يدل على اخلاص الشاعر

ماظن احد يقدر يجيب مثل هذي الابيات الشعرية الرائعة الا واحد فقط اممااااااااااااااااااسي وبس

يسلموووو فديتك

بصرااحه احرجتني بكلااامك وذووقك الراقي .،،

خالص شكري وتقديري لـك .،،